Жәнібек Әлімханұлы жаңа салмақта әлем чемпионы болуға ниетті
Фото: Личный архив
Қазақстандық боксшы Жәнібек Әлімханұлы (17-0, 12 КО) WBO ұйымының оны екінші орта салмақтағы әлем чемпионы атағына міндетті үміткер ретінде бекітуіне қатысты пікір білдірді, деп хабарлайды Pin-UpSport.kz.
Бұл салмақтағы WBO чемпиондық белбеуі британдық Хамза Ширазға (24-0-1, 19 КО) тиесілі. Ресми шешім шыққаннан кейін Әлімханұлы жаңа салмақта чемпиондық атаққа қол жеткізуге ниетті екенін мәлімдеді. «Бұл жекпе-жекті асыға күтемін! Жақында екі салмақта әлем чемпионы атанамын!» – деп жазды қазақстандық боксшы Х әлеуметтік желісіндегі парақшасында.
Бұған дейін Жәнібек Әлімханұлы орта салмақта WBO және IBF чемпиондық белбеулерін иеленген. Шілде айында ол екінші орта салмаққа көтерілу туралы шешім қабылдап, осы дивизиондағы WBO рейтингінде екінші орынға орналасты. Енді ұйымның шешіміне сәйкес, қазақстандық боксшы чемпиондық белбеу үшін міндетті үміткер мәртебесіне ие болды.
Айта кетейік, Әлімханұлы мен Шираз бұған дейін орта салмақта кездесуге жақын болған. Тараптар жекпе-жекті ұйымдастыру мәселесін талқылағанымен, британдық боксшы кейін басқа салмақ дәрежесіне ауысуды таңдады. Енді екі спортшының жекпе-жегі екінші орта салмақта өтуі мүмкін. Егер тараптар келісімге келсе, Жәнібек жаңа салмақтағы алғашқы чемпиондық кездесуін өткізіп, екі салмақта әлем чемпионы атануға мүмкіндік алады.
