Кұралай Егінбайқызы жастар арасындағы Азия чемпионатының күміс жүлдегері атанды
Қазақстандық боксшы Кұралай Егінбайқызы Индонезияның Джакарта қаласында өтіп жатқан 23 жасқа дейінгі спортшылар арасындағы Азия чемпионатында күміс медаль жеңіп алды, деп хабарлайды Pin-UpSport.kz.
80 келіге дейінгі салмақ дәрежесінде өнер көрсеткен қазақстандық спортшы жеребе қорытындысы бойынша бірден финалға жолдама алды. Шешуші жекпе-жекте ол Өзбекстан өкілі Рухшона Парпиевамен қолғап түйістірді.
Алғашқы раундта басымдық өзбекстандық боксшының жағында болды. Екінші раундтан кейін де төрешілер Парпиеваны алға шығарды. Соңғы үш минуттық кезеңде Кұралай жекпе-жектің бағытын өзгерте алмады. Нәтижесінде жеңіс өзбекстандық спортшыға бұйырып, қазақстандық боксшы жарысты күміс медальмен аяқтады.
Бұған дейін Қазақстан құрамасына алтын медальді Шұғыла Нәлібай сыйлаған болатын. Ол 75 келіге дейінгі салмақ дәрежесінің финалында үндістандық Мусканды төрешілердің бірауызды шешімімен жеңіп, Азия чемпионы атанды.
