«Қайсар» Виктор Мозеспен ресми келісімшартқа қол қойды
Фото: CameraSport
«Қайсар» клубы 35 жастағы нигериялық вингер Виктор Мозеспен келісімшартқа қол қойғанын ресми түрде мәлімдеді, деп хабарлайды Pin-UpSport.kz. Бұған дейін Еуропаның бірқатар алпауыт клубтарында және Нигерия ұлттық құрамасында өнер көрсеткен тәжірибелі ойыншы Қызылорда командасының сапын жаңа маусым алдында толықтырды.
Клуб басшылығы мен жаттықтырушылар штабы Мозестің келуін маңызды қадам ретінде бағалап отыр. «Қайсар» өкілдерінің пікірінше, оның халықаралық деңгейдегі тәжірибесі, ойын мәдениеті мен кәсіби көзқарасы команданың жалпы дамуына оң әсерін тигізіп, жас футболшылардың өсуіне серпін береді. Сондай-ақ ол алаңда ғана емес, ұжым ішінде де көшбасшы бола алады деп күтілуде.
Виктор Мозес кәсіби мансабын Англиядағы «Кристал Пэлас» клубында бастаған. Кейін «Уиган Атлетик» сапында ойнап, «Челсидің» назарын өзіне аударды. Оның мансабындағы ең сәтті кезең 2016/17 маусымына тұспа-тұс келді. Антонио Конте жаттықтырған кезде Мозес «Челси» құрамында Англия Премьер-лигасының чемпионы атанып, команданың негізгі ойыншыларының бірі болды. Сондай-ақ ол Лондон клубымен бірге Англия кубогы мен Еуропа лигасын жеңіп алды.
Әр жылдары футболшы «Ливерпуль», «Сток Сити», «Вест Хэм», «Фенербахче», «Интер», Мәскеудің «Спартагы» және «Лутон Таун» клубтарында өнер көрсетті. Нигерия құрамасы сапында да ірі халықаралық жарыстарға қатысқан. «Қайсар» клубы Виктор Мозестің тәжірибесі алдағы маусымда команданың тұрақты нәтижеге қол жеткізуіне және қойылған мақсаттарды орындауына көмектеседі деп сенеді.
Айбар Рысдаулет
Елена Рыбакина Australian Open-2026 турнирінің 1/8 финалына сенімді өтті
Луиш Нани мансабын «Ақтөбе» клубында жалғастырады