Луиш Нани мансабын «Ақтөбе» клубында жалғастырады
Фото: ФК Актобе
Португалия ұлттық құрамасының бұрынғы жартылай қорғаушысы, Англия Премьер-лигасының төрт дүркін чемпионы Луиш Нани жақын арада «Ақтөбе» футбол клубымен келісімшартқа қол қояды, деп хабарлайды Pin-UpSport.kz. Дереккөздердің мәліметінше, 39 жастағы футболшы кәсіби мансабын қайта жандандырып, Қазақстан чемпионатында өнер көрсету туралы түпкілікті шешім қабылдаған.
Журналист Эльдар Аманбаевтың хабарлауынша, тараптар арасындағы келісім бір жылға есептеледі. Луиш Нани «Ақтөбе» сапына еркін агент ретінде қосылып, Қазақстан Премьер-лигасында ойнауға дайын болады. Сонымен қатар тәжірибелі жартылай қорғаушы алаңға 17-нөмірмен шығуды жоспарлап отыр. Бұл нөмір оның мансабында бірнеше мәрте қолданылған.
Луиш Нани португал футболының ең танымал өкілдерінің бірі саналады. Ол клубтық деңгейдегі басты жетістіктеріне «Манчестер Юнайтед» құрамында қол жеткізіп, Англия чемпионатын төрт рет жеңіп алды, сондай-ақ УЕФА Чемпиондар лигасы мен клубтар арасындағы әлем чемпионатының жеңімпазы атанды. Португалия құрамасы сапында Нани 2016 жылы Еуропа чемпионы болып, тарихи нәтижеге өз үлесін қосты.
Нанидің «Ақтөбеге» келуі Қазақстан Премьер-лигасы тарихындағы ең ауқымды трансферлердің бірі ретінде бағаланып отыр. Клуб басшылығы оның бай халықаралық тәжірибесі командаға маңызды пайда әкеліп, жас футболшылардың дамуына оң ықпал етеді деп сенеді. Жақын күндері «Ақтөбе» клубы келісімшарттың ресми түрде жасалғанын жариялап, ойыншыны жанкүйерлерге таныстырады деп күтілуде.
Айбар Рысдаулет
«Қайсар» Виктор Мозеспен ресми келісімшартқа қол қойды
Елена Рыбакина Australian Open-2026 турнирінде қанша табыс тапқаны белгілі болды