Айбек Оралбай Азия ойындарында алтын медаль жеңіп алды
90 келіден жоғары салмақтағы әлем чемпионы, қазақстандық боксшы Айбек Оралбай Жапонияның Айти және Нагоя қалаларында өтіп жатқан жазғы Азия ойындарында алтын медаль жеңіп алды, деп хабарлайды Pin-UpSport.kz.
Финалда қазақстандық ауыр салмақтағы боксшы өзбекстандық Жахонгир Зокировпен кездесті. Жекпе-жектің алғашқы секундтарынан бастап қос боксшы белсенді қимылдап, ринг ортасын бір-біріне бермеді. Кездесу барысында Оралбай дәл соққыларымен басымдық танытып, төрешілердің бірауызды шешімімен 5:0 есебімен жеңіске жетті.
Финалға дейін Оралбай қырғызстандық Мирзакир Қошалиев пен үндістандық Наредерді жеңді. Екі жекпе-жекте де қазақстандық боксшы 5:0 есебімен басым түсті. Бүгін бұған дейін 70 келіге дейінгі салмақта Торехан Сабырхан алтын медаль иеленген еді.
Оралбайдың алтыны Қазақстан құрамасының қазіргі Азия ойындарындағы 11-ші алтын медалі болды. Ауыр салмақта қазақстандық боксшылар бұған дейін Азия ойындарында екі рет чемпион атанған: Мұхтархан Ділдәбеков 1998 жылы, Иван Дычко 2014 жылы алтын медаль жеңіп алған.
