«Қайрат» Чемпиондар лигасында сырт алаңда «Сутьесканы» жеңді
Фото: Arsenal FC
Алматылық «Қайрат» Чемпиондар лигасының алғашқы іріктеу кезеңінен сәтті өтіп, қарымта матчта Черногорияның «Сутьеска» командасын жеңді, деп хабарлайды Pin-UpSport.kz.
Алғашқы ойында 2:1 есебімен жеңіске жеткен Қазақстан чемпионы Никшичте өткен жауапты кездесуде де сенімді ойын көрсетті. Бірінші таймда есеп ашылмағанымен, алматылықтар бірнеше қауіпті шабуыл ұйымдастырды. Үзілістен кейін алаң иелері белсенділік танытқанымен, «Қайрат» қысымды еңсеріп, өз мүмкіндіктерін тиімді пайдаланды.
70-минутта Бекболат қарсылас қақпашысы Владо Гиленнің қателігін пайдаланып, есеп ашты. 79-минутта «Сутьеска» Ражнатовичтің алаңнан қуылуына байланысты азшылықта қалды. Ал 82-минутта Жоржиньо қолмен ойнағаны үшін белгіленген пенальтиді сәтті орындап, матчтың қорытынды есебін – 2:0 етіп белгіледі.
Осылайша, екі матчтың қорытындысы бойынша «Қайрат» 4:1 есебімен жеңіске жетіп, Чемпиондар лигасының екінші іріктеу кезеңіне жолдама алды. Келесі кезеңде алматылық клуб Кипрдің «Омония» командасымен кездеседі.
