Шұғыла Нәлібай жастар арасындағы Азия чемпионы атанды
Қазақстандық боксшы Шұғыла Нәлібай Индонезияның Джакарта қаласында өтіп жатқан 23 жасқа дейінгі спортшылар арасындағы Азия чемпионатында алтын медаль жеңіп алды, деп хабарлайды Pin-UpSport.kz.
75 келіге дейінгі салмақ дәрежесінің финалында Нәлібай Үндістан өкілі Мусканмен кездесті. Қазақстандық боксшы жекпе-жектің алғашқы секундтарынан бастап басымдықты қолға алып, бірінші раундты төрешілердің бірауызды 5:0 шешімімен өз пайдасына аяқтады.
Екінші раундта да Шұғыла қарсыласынан басым түсіп, төрешілердің толық қолдауына ие болды. Соңғы үш минуттық кезеңде де ол артықшылығын сақтап, жекпе-жекте төрешілердің бірауызды шешімімен жеңіске жетіп, Азия чемпионы атанды.
Бұл алтын медаль Қазақстан құрамасы үшін U23 санатындағы жастар арасындағы Азия чемпионатындағы алтыншы чемпиондық болды. Бұған дейін 70 келіге дейінгі салмақта Азиза Исина Өзбекстан өкілі Райхона Курбонбоеваны жеңіп, алтын медаль еншілеген еді.
