АҚШ ірі есеппен жеңді, Канада әлем чемпионатындағы алғашқы ұпайына қол жеткізді
Футболдан ӘЧ-2026 турнирінің екінші ойын күнінде алаң иелері саналатын Канада мен АҚШ құрамалары алғашқы матчтарын өткізді, деп хабарлайды Pin-UpSport.kz. Канада Босния және Герцеговинамен тең түссе, АҚШ құрамасы Парагвайды ірі есеппен жеңіп, өз тобында көш бастады.
Канада құрамасы үшін бұл кездесу ерекше маңызға ие болды. Өйткені бұған дейін әлем чемпионаттарында өткізген алты матчтың бәрінде жеңіліп келген команда алғаш рет ұпай жинады. Ал АҚШ құрамасы өз жанкүйерлері алдында сенімді ойын көрсетіп, плей-оффқа шығуға басты үміткерлердің бірі екенін дәлелдеді.
В тобындағы Канада мен Босния және Герцеговина арасындағы матч 1:1 есебімен аяқталды. Алғаш болып босниялықтар алға шықты. Гол авторы – Йово Лукич. Екінші таймда Кайл Ларин таразы басын теңестіріп, Канадаға тарихи ұпай сыйлады. Ал D тобындағы кездесуде АҚШ Парагвайды 4:1 есебімен жеңді. Америкалықтар үзіліске дейін үш гол соғып үлгерді. Фоларин Балоган дубль авторы атанса, тағы бір гол автогол ретінде тіркелді. Екінші таймда Маурисио Парагвай сапынан бір гол қайтарғанымен, матч соңында Джованни Рейна есепті 4:1-ге жеткізді.
Осы нәтижеден кейін Канада әлем чемпионаттары тарихындағы алғашқы ұпайын еншіледі және келесі кезеңге шығу мүмкіндігін сақтап қалды. Ал АҚШ құрамасы ірі жеңіспен басталған турнирден кейін плей-офф жолдамасына таласта маңызды артықшылыққа ие болды. Екі команда үшін де келесі тур ойындары топтағы жағдайды анықтайтын маңызды кездесулер болмақ.
Айбар Рысдаулет
Футболдан әлем чемпионаты: 13 маусымдағы ойындар күнтізбесі
«Астана» ойыншысы әлем чемпионатында ҚПЛ тарихына енді