1000 голды көздеген Роналду «Әл-Насрмен» жаңа келісімге келді
Криштиану Роналду. Фото: Al Nassr FC via Getty Images
Португалиялық жұлдыз Криштиану Роналду «Әл-Наср» клубымен жаңа екі жылдық келісімшартқа қол қоюға келісті. Financial Times басылымының мәліметінше, шабуылшы жылына 200 миллион еуро табыс табады. Жалпы сомасы — 400 миллион еуро. Осылайша, ол әлемдегі ең көп жалақы алатын футболшы атанбақ.
Жаңа келісім бойынша Роналду клубтың аздаған үлесіне де ие болады. Сондай-ақ ол команда құрылымын дамытуға белсенді атсалысуда. Соның бір дәлелі — «Астон Вилладан» келген колумбиялық шабуылшы Джон Дуранның трансфері.
Криштиануның басты мақсаты — кәсіби мансабындағы 1000 голды еңсеру. Қазірдің өзінде оның есебінде 933 гол бар, ал биылғы маусымда 32 мәрте қарсылас қақпасын дәл көздеген. Екі жылда бұл межеге жетуге толық мүмкіндігі бар.
Айта кетейік, Роналду «Әл-Наср» сапына 2023 жылдың қаңтарында еркін агент ретінде қосылған болатын.
