«Голливуд актері», қатал басшы әрі данышпан: The Athletic Гвардиоланың «Манчестер Ситидегі» 10 жылы туралы тың деректерді жариялады
Алаң жиегінде өзін актер секілді ұстайтын, футболға өмірін арнаған, жеңісті үйреншікті нәрсеге айналдырған адам Пеп Гвардиола туралы The Athletic үлкен материал шығарды. Бұл тек трофейлер мен рекордтар жайлы әңгіме емес. Бұл – футболға толықтай беріліп кеткен адамның тарихы. Гвардиола «Манчестер Ситиді» әлемдегі ең мықты клубтардың біріне айналдырып қана қоймай, бүкіл өмірін осы жобаға арнады.
Манчестердегі он жыл ішінде Гвардиола заманауи футбол тарихындағы ең үздік командалардың бірін құрды. Жеті маусымда алты рет АПЛ чемпионы атану, қатарынан төрт чемпиондық, требл және Чемпиондар лигасындағы жеңіс – мұның бәрі бұрын қол жетпейтін жетістік сияқты көрінетін. Бірақ клуб ішінде бұл табыстар ешқашан қалыпты нәрсе ретінде қабылданбаған. Бұрынғы ойыншылардың айтуынша, Пеп үлкен жеңістен кейін де бірден келесі мақсатты ойлай бастайтын. Мысалы, команда 100 ұпай жинаған маусымнан кейін ойыншылар тойлап жүрген кезде, ол бәрін жинап алып, босаңсуға болмайтынын айтқан. Өйткені Гвардиола үшін «жеткілікті жақсы» деген ұғым мүлде болмаған.
The Athletic материалында испан маманының ұсақ-түйекке дейін мән беретіні ерекше айтылған. Илкай Гюндоган бір жаттығуды еске алады: Гвардиола жаңа тактиканы түсіндіруге бір сағатқа жуық уақыт жұмсап, бәрін эмоциямен жеткізген. Бірақ жаттығу басталғаннан кейін біраз уақыт өтіп, өзі тоқтатып: «Ұмытыңдар, бұл жұмыс істемейді», – деген. Келесі күні ол жаңа жоспармен келген. Ойыншылардың айтуынша, дәл осы тоқтаусыз ізденіс оны ерекше бапкер етті. Пеп матч алдында схеманы өзгертіп жіберуі, футболшыларды мүлде басқа позицияға қоюы немесе күтпеген шешім қабылдауы қалыпты жағдай болған. Бернарду Силва бір кездесудің алдында Гвардиола оны орталық қорғаушы ретінде дайындағанын айтқан. Кейін жоспар өзгергенімен, бұл Пептің футболды мүлде басқаша ойлайтынын көрсетеді.
Гвардиола клубқа келген алғашқы айларда-ақ «Ситидің» ішкі тәртібін өзгертіп жіберді. Ол ойыншылардың бірге таңғы ас ішіп, бірге түскі ас ішуін талап етті, футболшылар бір-бірімен сөйлессін деп базадағы Wi-Fi-ды өшіріп тастаған кездер болған. Сонымен қатар ол ойыншылардың салмағын қатаң бақылап, шетелдік футболшылардың ағылшын тілін үйренуін міндеттеген. Кез келген ережеден ауытқу оған ұнамайтын. Бакари Саньяның айтуынша, егер ойыншының салмағы рұқсат етілген межеден асып кетсе, ол командамен бірге жаттығудан шеттетілетін. Ал алғашқы жаттығулардың бірінде Пеп бір қателіктен кейін ойынды тоқтатып: «Бірінші минуттан соңғы минутқа дейін толық күшпен ойнау керек», – деген. Кейін бұл сөз бүкіл Гвардиола дәуірінің басты ұранына айналды.
Бірақ Гвардиоланың әдістері физикалық тұрғыда ғана емес, психологиялық жағынан да ауыр болған. Көптеген футболшылар онымен жұмыс істеу үшін мықты мінез керек екенін айтқан. Қосалқы құрамда қалып қойған ойыншылар өздерін оқшауланғандай сезінетін кездер жиі болған. Кейде Пеп негізгі құрамға қоспаған футболшымен апталап сөйлеспейтін. Соған қарамастан, ол әр ойыншыдан мінсіз дайындық пен дұрыс көзқарас күтті. Команда ішінде бұл ереже «жаман көңіл-күй болмауы керек» деген ұстаным ретінде танылған. Гвардиола реніш пен наразылық ұжымға кері әсер етеді деп есептеген.
Материалда Пеп пен Серхио Агуэро арасындағы қарым-қатынасқа да ерекше тоқталған. Алғашқы маусымдарда екеуінің арасында жиі келіспеушілік болған. Агуэро бапкер өзін прессингке дұрыс қатыспайды деп ұнатпайды деп ойлаған. Бірақ уақыт өте келе Гвардиола шешім тапты – команда жүйесін өзгертіп, Агуэроның қорғаныста аз жұмыс істеуіне мүмкіндік берді, ал қалған ойыншылар оның жүгін бөлісті. Фернандиньоның сөзінше, дәл осындай шешім табу қабілеті Гвардиоланы өзгелерден ерекшелендірген.
The Athletic өткен маусым Пеп үшін ең қиын кезеңдердің бірі болғанын да жазады. Нәтижелердің төмендеуі, құрамдағы мәселелер, «115 айып» төңірегіндегі қысым және жеке өміріндегі қиындықтар оның көңіл-күйіне әсер еткен. Клуб ішіндегі адамдардың айтуынша, Гвардиола қатты шаршаған әрі эмоционалды түрде әлсіреген күйде жүрген. Кей матчтардан кейін жақындарына хабарлама жазып, командада не болып жатқанын түсіндіруге тырысқан. Бірақ соның өзінде жаңа идея іздеуді тоқтатпаған. Команданы жаңарту үшін штабқа Юрген Клопптың бұрынғы көмекшісі Пеп Лейндерс шақырылды, ал Гвардиоланың өзі бұрынғыға қарағанда басқа адамдардың пікіріне көбірек құлақ аса бастаған.
Қатал талаптарына қарамастан, клуб қызметкерлерінің көбі Гвардиоланы адамдарға шынайы жанашырлықпен қарайтын тұлға ретінде сипаттайды. Ол бонустарын қызметкерлермен бөліскен, пандемия кезінде жұмыс орындарын сақтап қалуға тырысқан және команданың жетістігіне тек футболшылар емес, база қызметкерлері, аспаздар, күзетшілер мен әкімшілік өкілдері де қатысы бар екенін жиі айтқан. Фернандиньоның айтуынша, клубтағы көптеген адам Пеп үшін бәріне дайын болған, өйткені ол адамдарға ерекше құрметпен қараған.
Соңғы айларда Гвардиола Англиядағы өмірі туралы жиі сағынышпен айта бастады. Ол әсіресе ағылшын футболының атмосферасын жақсы көргенін жасырмайды – төменгі лига командаларына қарсы сырт алаңдағы матчтар, ескі стадиондар, жанкүйерлердің дауысы мен кубок ойындарының ерекше рухы оған қатты әсер еткен. Осы он жыл ішінде Пеп жай ғана «Манчестер Ситидің» бапкері емес, тұтас бір дәуірдің символына айналды. Сондықтан оның мұрасын тек кубоктармен өлшеу мүмкін емес. Бұл – футболды өзгерткен, клубты империя деңгейіне көтерген және сол жолда өзін де толықтай футболға арнаған адамның тарихы.
Айбар Рысдаулет
Нидерланд құрамасы ӘЧ-2026 турниріне арналған құрамын жариялады
Елена Рыбакина «Ролан Гаррос» турнирінің үшінші айналымына шыға алмады