Головкин XXI ғасырдың ең ұлы боксшылары қатарына енді
Геннадий Головкин. Фото: Getty Images
Қазақстандық былғары қолғап шебері Геннадий Головкин ХХІ ғасырдың ең ұлы боксшыларының рейтингіне енді. Бұл тізімді беделді америкалық Boxingmedia порталы жариялады, деп хабарлайды Pin-UpSport.kz.
Басылым сарапшылары заманауи бокстың ең ықпалды 25 тұлғасын анықтап, аңызға айналған қазақстандық боксшыны 11-орынға орналастырды. Рейтинг ХХІ ғасырдың басынан бергі кезеңді қамтып, тек чемпиондық атақтарды ғана емес, спортшының дивизиондағы тұрақтылығын, қарсыластарының деңгейін және жаһандық бокстың дамуына қосқан үлесін де есепке алған.
Boxingmedia жасаған бағалау кәсіби мансаптың барлық негізгі қырларын қамтыды. Геннадий Головкин ұзақ жылдар бойы орта салмақтағы басты есімдердің бірі болып, бірнеше мәрте әлем чемпиондық белбеулерін қорғады және өз дәуіріндегі ең жоғары деңгейдегі жекпе-жектерге қатысты. Оның тұрақты нәтижелері мен техникалық шеберлігі қазақстандық бокс мектебінің халықаралық аренадағы беделін айқындады.
Рейтингтің көшін Флойд Мэйвезер бастап тұр. Екінші орынға Мэнни Пакьяо жайғасса, үздік үштікті Бернард Хопкинс түйіндеді. Алғашқы бестікке сондай-ақ Александр Усик пен Сауль Альварес кірді. Геннадий Головкин бұл тізімде жапониялық нокаут шебері Наоя Иноуэ мен британдық Джо Калзаге арасынан орын алды.
Айта кетейік, бұған дейін Геннадий Головкин Халықаралық бокс даңқ залына ресми түрде енгізілген болатын. Оның кәсіпқой мансабында 45 жекпе-жек бар, соның 42-сінде жеңіске жетіп, 37 рет қарсыласын нокаутпен ұтты. Boxingmedia рейтингіне енуі Головкиннің ХХІ ғасыр боксының символдарының бірі екенін тағы бір мәрте дәлелдеп, оның спорттағы мұрасын халықаралық деңгейде айқындай түсті.
Айбар Рысдаулет
Қазақстан футболшы Ла Лига клубына ауысуға жақын
Таеквондодан Қазақстан іріктеу чемпионатының жеңімпаздары анықталды