Виктор Мозес Қазақстан Премьер-Лигасында өнер көрсетеді
Фото: Athena Pictures
Нигериялық тәжірибелі футболшы Виктор Мозес мансабын Қазақстанда жалғастырады. Бұрын «Челси» сапында ойнаған 35 жастағы ойыншы бір жылдық келісімшарт негізінде қызылордалық «Қайсар» клубына қосылады, деп хабарлайды Pin-UpSport.kz.
Осылайша, халықаралық деңгейде мол тәжірибе жинаған футболшы Қазақстан Премьер-Лигасында доп тебетін болады, ал бұл ауысым маусымаралық кезеңдегі ең назар аударарлық трансферлердің бірі саналып отыр.
Виктор Мозестің мансабындағы ең табысты кезең «Челси» клубымен байланысты. Ол кәсіби жолын «Кристал Пэлас» командасында бастап, кейін «Уиган Атлетикте» ойнап жүріп лондондық клубтың назарына ілікті. 2016/17 жылғы маусымда Антонио Конте жетекшілігімен Мозес қапталдағы қорғаушы позициясында тұрақты ойын көрсетіп, «Челсидің» Англия Премьер-лигасындағы чемпиондығына елеулі үлес қосты. Сол маусымда ол негізгі құрам ойыншысы ретінде танылды.
Футболшы клубтық мансабында «Сток Сити», «Вест Хэм», «Фенербахче», «Интер», Мәскеудің «Спартак» клубы және «Лутон Таун» секілді командалардың намысын қорғады. Сонымен қатар Нигерия ұлттық құрамасында 38 матч өткізіп, 12 гол соққан. Оның әмбебаптығы шабуыл шебінде де, қорғаныста да тиімді ойнауына мүмкіндік береді, бұл қасиет «Қайсар» үшін маңызды артықшылық болмақ.
Виктор Мозестің «Қайсар» ойыншысы ретіндегі ресми таныстырылымы 24 қаңтар күні Қызылорда қаласында өтеді деп жоспарланған. Клуб үшін бұл трансфер алдағы маусымдағы мақсаттарды жүзеге асыру жолындағы маңызды қадам саналады. Алдағы уақытта бапкерлер штабы тәжірибелі легионерді команда құрамына бейімдеп, оның чемпионаттағы рөлін айқындайтын болады.
Айбар Рысдаулет
Анна Данилина жұптық сында Australian Open турнирін жеңіспен бастады
«Қайрат» 2026 жылы Алматы қаласының бюджетінен 750 миллион теңге алады