Санжар Тәшкенбай әлем кубогының финалына шықты
Санжар Ташкенбай
Екі дүркін әлем чемпионы Санжар Тәшкенбай Қытайдың Гуйян қаласында өтіп жатқан World Boxing әлем кубогының екінші кезеңінде финалға жолдама алды, деп хабарлайды Pin-UpSport.kz. Қазақстандық боксшы жартылай финалда сенімді жеңіске жетіп, кем дегенде күміс медальді қамтамасыз етті.
50 келіге дейінгі салмақ дәрежесінде өнер көрсететін Тәшкенбай Қазақстан құрамасының басты үміткерлерінің бірі саналады. Финал жолдамасы үшін өткен кездесуде оған Испания өкілі Мартин Молина Сальвадор қарсы тұрды.
Жекпе-жек барысында қазақстандық боксшы толық басымдық танытты. Ол үш раунд бойы қарсыласынан басым түсіп отырды. Үшінші раундта Тәшкенбайдың дәл соққысынан кейін төреші испаниялық спортшыға нокдаун есебін ашты. Кездесу қорытындысында бес төрешінің барлығы жеңісті бірауыздан 5:0 есебімен қазақстандық боксшыға берді.
Осылайша Санжар Тәшкенбай турнирдің финалына шығып, алтын медаль үшін күресетін болды. World Boxing әлем кубогының екінші кезеңі 15-21 маусым аралығында өтуде. Жарысқа әлемнің 44 елінен шамамен 333 спортшы қатысуда.
