Қазақстандық шабуылшы «Леванте» клубымен ұзақ мерзімді келісімшартқа қол қойды
Фото: Алдияр Нургали
Қазақстандық шабуылшы Алдияр Нұрғали Испанияның «Леванте» клубымен ұзақ мерзімді келісімшартқа қол қойды, деп хабарлайды Pin-UpSport.kz.
Келісімшарт «3+2» форматы бойынша жасалып, футболшының клуб құрылымындағы болашақ дамуын нақты айқындайтын шарттарды қамтиды.
Астанада дүниеге келген Алдияр Нұрғали Қазақстанның жасөспірімдер құрамасының намысын қорғап келеді. Соңғы жылдары ол шабуыл шебіндегі нәтижелі ойынымен және тұрақты дамуының арқасында еуропалық клубтардың назарын өзіне аударды. Испания футбол мектебі жас ойыншыларды дамытуымен танымал, ал «Леванте» академиясы да талантты футболшыларды негізгі құрамға шығаруда тәжірибеге ие. Бұған дейін қазақстандық шабуылшыға «Валенсия» мен «Вильярреал» клубтары қызығушылық танытқаны хабарланған болатын.
Келісімшарт шарттарына сәйкес, 17 жастағы футболшы 2026 жылдың көктеміне дейін «Леванте» клубының U-19 жасөспірімдер құрамында өнер көрсетеді. Қазіргі таңда команда өз чемпионатында екінші орында тұр және Испания кубогының іріктеу кезеңінен сәтті өтті. Егер келісімшарттағы қосымша екі жылдық опция іске қосылса, клуб ойыншыны негізгі құрамға ауыстыруға міндеттенеді. Ал келісім ұзартылмаған жағдайда, Нұрғали еркін агент мәртебесіне ие болады.
Жақында өткен «Эльче» командасына қарсы матчта Алдияр Нұрғали дубль авторы атанып, өз ұжымына 2:1 есебімен жеңіс алып келді. «Леванте» клубымен келісімшартқа қол қою қазақстандық шабуылшы үшін кәсіби мансабындағы жаңа кезеңнің басталғанын білдіреді. Алдағы уақытта оның басты мақсаты жасөспірімдер құрамында тұрақты ойын көрсетіп, Испания футболындағы жоғары деңгейге көтерілу болмақ.
Айбар Рысдаулет
Goal нұсқасы бойынша АПЛ-2025/26 маусымының үздік ойыншысы анықталды
Роналду Сауд Арабиясы чемпионатында дубль жасап, жаңа рекорд орнатты