«Канело» Головкинмен кездесуі туралы пікір білдірді
Мексикалық боксшы Сауль Альварес Мысырдың Гиза қаласында Геннадий Головкинмен болған кездесуі жайлы әсерімен бөлісті, деп хабарлайды Pin-UpSport.kz.
Екі боксшы Александр Усик пен Рико Верхувен арасындағы жекпе-жек өткен бокс кешіне арнайы қатысты. Турнирден кейін Альварес бұрынғы қарсыласымен қайта жүздескеніне қуанышты екенін айтты.
«Біз Геннадиймен түрлі естеліктерімізбен бөлістік. Арамызда үш жақсы жекпе-жек өтті. Біз бір рингте өнер көрсеттік, сондықтан талқылайтын нәрсе көп болды. Ол қазір қалағанын істей алады. Менің ойымша, ол соған лайық. Егер қайта оралып, тағы бір жекпе-жек өткізсе, бұл жақсы болады», — деді Альварес PBF-ке берген сұхбатында.
Еске салсақ, Головкин мен «Канело» үш рет жұдырықтасқан. 2017 жылғы алғашқы айқас тең аяқталса, кейінгі екі кездесуде төрешілер шешімімен мексикалық боксшы жеңіске жеткен еді.
Қазіргі таңда Геннадий Головкин World Boxing халықаралық ұйымының президенті қызметін атқарады.
