Әлімханұлы ықтимал біріктіру жекпе-жегіне дайындықты бастады
Жанибек Алимханулы. Фото: Boxing News 24
Орта салмақта WBO және IBF нұсқалары бойынша әлем чемпионы Жәнібек Әлімханұлы ықтимал біріктіру жекпе-жегіне дайындықты бастады, деп хабарлайды Pin-UpSport.kz.
Журналист Аслан Қаженовтің мәліметінше, қазіргі уақытта қазақстандық боксшы Алматыда болып, толыққанды жаттығу жиыны басталғанға дейін физикалық дайындығын сақтап жүр.
Дереккөздің айтуынша, спортшы уақытша шеттетілгеніне қарамастан, оның командасы жоспарлы түрде дайындық жұмыстарын жалғастырып жатыр. Қазіргі кезеңде Әлімханұлы жалпы физикалық дайындығын сақтауға көңіл бөлуде. Негізгі жаттығу лагері жаз мезгілінде басталуы мүмкін. Ал дайындық жиынын АҚШ-та немесе Ұлыбританияда өткізу нұсқалары қарастырылып жатыр.
«Қазір Жәнібек Алматыда. Жазға қарай ол жаттығу лагеріне кіруді жоспарлап отыр. Жаттығу жиыны Америкада немесе Англияда өтуі мүмкін. Одан кейін ол спорттық бабын жоғалтпау үшін жоспар бойынша дайындық жалғасады. Келесі жылы, нақтырақ айтқанда сәуір немесе мамыр айларында Жәнібек тағы бір титул үшін жекпе-жек өткізуі мүмкін. Оның қарсыласы WBC чемпионы Карлос Адамес немесе WBA чемпионы Эрисланди Лара болуы ықтимал. Бұл жекпе-жекке кешенді дайындық қазірден басталып кетті», – деп жазды Қаженов әлеуметтік желіде.
Еске салсақ, 20 ақпанда World Boxing Organization ұйымы Жәнібек Әлімханұлына бір жылдық дисквалификация жариялаған болатын. Шектеу мерзімі 2 желтоқсанға дейін күшінде болады. Осы уақыт аралығында қазақстандық боксшы кәсіби де, көрме жекпе-жектерге де қатыса алмайды.
Айбар Рысдаулет
Морозова конькимен жүгіруден әлем чемпионатында жетінші орын алды
Бублик Индиан-Уэллстегі жұптық жарыста жеңіліс тапты