2026 жылы Қазақстанда FIFA Series турнирінің матчтары өтеді

Турнирдің басты мақсаты – ұлттық құрамаларға басқа конфедерация командаларымен ойнауға жағдай жасап, футбол мәдениеттерін жақындастыру. FIFA Series алғаш рет 2024 жылы пилоттық форматта өткен болатын. Ал 2026 жылы турнир толық көлемде ұйымдастырылып, алғаш рет әйелдер құрамаларын да қамтиды.

ФИФА президенті Джанни Инфантино бұл жобаның маңызын атап өтті:

«FIFA Series футболшылардың, жаттықтырушылардың және жанкүйерлердің әлеуетін ашуға бағытталған. Әртүрлі елдерді бір алаңда тоғыстырып, футболдың алуан түрлілігін көрсету – басты мақсатымыз. 2026 жылғы турнир ерлер мен әйелдер футболының дамуына қосымша серпін бермек», – деді ол.

Қазақстан FIFA Series 2026 турнирін қабылдайтын алғашқы елдердің қатарына енді. Сонымен қатар Аустралия, Әзербайжан, Индонезия, Маврикий, Пуэрто-Рико, Руанда және Өзбекстан да матчтар өткізеді. Әйелдер құрамаларының ойындары Бразилия, Кот-д’Ивуар және Таиландта өтеді.

Қазір ФИФА басқа да ұлттық қауымдастықтармен келіссөздер жүргізіп жатыр. Турнирге қатысатын барлық елдердің толық тізімі 2026 жылдың басында жарияланады.

Әр топта түрлі құрлықтан төрт команда болады. Әр құрама екі ойыннан өткізеді. Бұл күнтізбедегі матч санын көбейтпеуге мүмкіндік береді. Осының арқасында халықаралық кездесулердің сапасын арттыруды көздейді.