Балауса Муздиман 6 маусымда шаршы алаңға шығады
Фото: muzdi___/Instagram
Қазақстандық боксшы Балауса Муздиман бастапқыда күшін жойған жекпе-жегінің 6 маусым күні өтетінін мәлімдеді. Бұл туралы спортшы Instagram парақшасында хабарлады.
«6 маусымда өтетін жекпе-жекке тыңғылықты дайындалдық. Салмақ түсірдік, моральдық жағынан да, физикалық жағынан да бар күшімізді салдық. Алайда үш күн қалғанда ұйымдастырушылар жекпе-жек болмайтынын айтты. Бұл біз үшін үлкен соққы болды. Бірақ командама алғысым шексіз – олар бұл мәселені шешіп берді», – деді ол.
Спортшының айтуынша, қазақстандық промоутерлер бірлесіп, боксшыларға қолдау көрсеткен. Енді Балауса 5 маусым күні таңертеңгілік салмақ өлшеуден өтіп, 6 маусымда рингке шығатынын мәлімдеді.
Айта кетейік, Балауса Муздиман осы кеш аясында мысырлық Айя Рамаданмен кездесуі керек еді. Турнирдің басты жекпе-жегі – Даня Милохин мен Байра арасындағы кездесу кейінге шегерілді.
