Балауса Муздиман – әлемнің үздік он боксшысының қатарында
Балауса Муздиман. Фото: muzdi___
Қазақстандық кәсіби боксшы қыз Балауса Муздиман рингтегі жолын сенімді жалғастырып келеді. 5 сәуірде Астанада өткен Жәнібек Әлімханұлының қатысуымен өткен бокс кешінде ол филиппиндік тәжірибелі Мария Тереза Пинилемен (7-2, 2 KO) қолғап түйістіріп, әдемі жеңіске жетті.
Сегіз раундқа созылған жекпе-жек төрешілер шешімімен Балаусаның пайдасына аяқталды. Жерлесіміз қарсыласынан басым түсіп, техникалық артықшылығын анық көрсетті.
Осы жеңістен кейін Балауса BoxRec жаңартылған рейтингінде үлкен серпіліс жасап, 53,5 келі салмақ дәрежесінде 14-орыннан 9-орынға көтерілді. Бұл – оның алғаш рет әлемнің үздік ондығына кіруі.
Айта кетейік, қазіргі таңда әйелдер боксында Қазақстан атынан тағы бір үміткер – Ангелина Лукас та әлемдік рейтингте үздік үштікке енген. Екі боксшы да ел үмітін ақтап, үлкен белестерге бет алып келеді.
