«Жәнібек – орта салмақтың үздігі»: Лиам Смит қазақстандық чемпионды мақтады
Лиам Смит
Орта салмақта бұрынғы әлем чемпионы Лиам Смит қазіргі салмақ дәрежесіндегі үздіктер туралы ойын айтты. Оның пікірінше, бұл дивизионда Жәнібек Әлімханұлына тең келетін боксшы жоқ.
36 жастағы британдық спортшы рингке қайта оралуға дайындалып жатыр. Келесі қарсыласы – жеңіліп көрмеген ирландиялық Аарон Маккенна. Біршама үзілістен кейін Смит әлі де орта салмақта жарқырауға дайын екенін айтты.
Сонымен қатар ол қазақстандық чемпионның мықтылығын да ерекше атап өтті.
«Қазір бұл салмақ бос сияқты, тек Жәнібек бар. Ол мүлде басқа деңгейде. Нағыз бабында жүрген кезін алсақ, ол – орта салмақтағы ең үздік боксшы. Ол Адамес пен Лараны да жеңеді», – деді Смит The Ring басылымына берген сұхбатында.
Айта кетейік, Жәнібек Әлімханұлы 5 сәуір күні Астанада WBO және IBF тұжырымдары бойынша чемпиондық атақтарын қорғайды. Қарсыласы – франциялық Анауэль Нгамиссенга.
