Головкин мен Мейвезер жұдырықтаса ма? DAZN-ның жазбасы жанкүйерлерді дүр сілкіндірді
Геннадий Головкин
DAZN стриминг қызметі Instagram-да Геннадий Головкин мен Флойд Мейвезердің суретін жариялап, «Сіз қалай жеңгіңіз келеді?» деген сұрақ қойды. Бұл жазба бокс жанкүйерлерінің қызу талқысына түсті.
Әзірге ресми ақпарат жоқ, бірақ DAZN-ның мұндай қадамы промоутерлердің ықтимал қызығушылығын білдіруі мүмкін. Бұл платформа бұрыннан үлкен бокс кештерін ұйымдастырып келеді, сондықтан олардың Головкин мен Мейвезер жекпе-жегін өткізу ойында болуы ғажап емес.
Мейвезер кәсіби мансабын 2017 жылы Конор Макгрегорды жеңгеннен кейін аяқтаған. Бірақ содан бері бірнеше шоу-айқастар өткізіп, көпшіліктің назарын өзіне аударып жүр. Мұндай жекпе-жектер статистикаға кірмегенімен, олар көрермендерді қызықтыратыны анық.
Головкин болса, мансабын аяқтағаны жайлы ресми мәлімдеме жасаған жоқ, бірақ соңғы жылдары айқас өткізбеді. Сондықтан екі аңыздың кездесуі мүмкін деген ой шындыққа жанасады, алайда әзірге бұл жай ғана болжам.
