Данияр Елеусіновтың менеджері оның ұсталуына қатысты пікір білдірді
Данияр Елеусинов
Олимпиада чемпионы Данияр Елеусіновтың менеджері Зия Алиев қазақстандық боксшының ұсталуына қатысты пікір білдірді, деп хабарлайды Pin-UpSport.kz. Оның айтуынша, команда болған жағдайға қарамастан спортшымен жұмысты жалғастырады.
Бұған дейін Астана қаласының Мамандандырылған ауданаралық әкімшілік құқық бұзушылықтар жөніндегі соты Елеусіновті мас күйінде көлік басқарғаны үшін кінәлі деп таныды. Сот шешімімен боксшы 20 тәулікке әкімшілік қамауға алынып, жеті жыл мерзімге көлік жүргізу құқығынан айырылды. Іс материалдарына сәйкес, ол алкогольдік масаң күйде көлік жүргізіп, үш жол-көлік оқиғасына себеп болған. Сот отырысында Данияр Елеусінов өз кінәсін толық мойындады.
Зия Алиевтің айтуынша, Елеусінов жақын арада Майамиге ұшып, тамыз айына жоспарланған Zuffa Boxing промоушеніндегі дебюттік жекпе-жегіне дайындықты бастауы тиіс болған. «Біз оның жақын күндері Майамиге келуін күтіп отырдық, өйткені келесі жекпе-жекке дайындықты бастау қажет еді. Тамыз айында Zuffa Boxing турнирінде дебют өткізу жоспарланған болатын. Жалпы, бұл ұйымдағы алғашқы жекпе-жегі түрлі себептерге байланысты кейінге шегеріліп келді. Ең бастысы – адам шығыны болған жоқ. Біз онымен сөйлесеміз. Кейде отбасындағы мәселелер басқа нәрсеге көңіл бөлуге мүмкіндік бермейді. Қыста да ол осындай ауыр күйзелісті бастан өткерген еді. Біз одан бас тартпаймыз. Өмірде әртүрлі жағдай болады. Әр суперқаһарманның өз әлсіз тұсы бар, Данияр үшін ол – отбасы», – деді Алиев.
Бұған дейін Данияр Елеусіновке қатысты жағдайға Қазақстанның еңбек сіңірген жаттықтырушысы Тұрсынғали Еділов те пікір білдірген болатын. Ол Олимпиада чемпионын қолдау қажет екенін айтқанымен, спортшы болған оқиға үшін көпшіліктен кешірім сұрауы тиіс екенін атап өтті.
