Скотт Мунн Қазақстан футбол федерациясының Бас хатшысы лауазымына тағайындалды

Бұл тағайындау қазақ футболы тарихында алғаш рет болып отыр. Федерация басшылығына Англия Премьер-лигасында жұмыс өтілі бар, Еуропаның беделді клубтық турнирінің бірінде жеңіске жеткен тәжірибелі маман тағайындалды.

С.Мунн федерацияның жаңа басшылығы бастаған реформаларды жалғастырады. Оған төрешілік жүйесін жетілдіру, академиялар мен инфрақұрылымды дамыту, клубтарды басқару және лицензиялау стандарттарын арттыру, тұрақты коммерциялық және медиа базаны қалыптастыру, сондай-ақ УЕФА және ФИФА ұйымдарымен ынтымақтастықты күшейту міндеті қойылды.

ҚФФ президенті Марат Омаров:
– Федерация шешуші кезеңде тұр. Біз отандық футболдың болашағын айқындайтын берік негіз қалыптастыру үстіндеміз. Жоғары нәтижеге жету үшін тәжірибесі мен тәртібі бар мамандар қажет. Скотт Мунн – өз тәжірибесін қазақстандық футболды дамытуға бағыттайтын білікті маман. Оның кандидатурасы бұл қызметтің барлық талабына сай келеді және ел футболын лайықты нәтижелерге жеткізеді деп сенемін.

ҚФФ Бас хатшысы Скотт Мунн:
– Осындай маңызды кезеңде Қазақстан футбол федерациясының құрамына қосылғаныма қуаныштымын. Президент Марат Омаров айқындаған бағыт пен федерацияның атқарған ауқымды жұмыстары маған үлкен әсер қалдырды. Елдегі футболды дамытуға үлес қосу үшін клубтармен де, халықаралық деңгейдегі әріптестермен де тығыз жұмыс істеуге асықпын.