Роналду «Әл-Насрдан» кету мүмкіндігін қарастырып жүр
Криштиану Роналду Фото: GI
Криштиану Роналду «Әл-Насрдағы» жағдайға көңілі толмай, клубтан кету нұсқасын қарастырып жатыр, деп хабарлайды Pin-UpSport.kz.
Record басылымының мәліметінше, португалиялық шабуылшының келісімшартын сатып алу құны 50 миллион еуроға бағаланған. Ал мансабын жалғастыруы мүмкін бағыттар ретінде МЛС пен Еуропа чемпионаттары аталып отыр. Дегенмен футболшы әзірге түпкілікті шешім қабылдамаған және клуб ішіндегі ахуалдың қалай өзгеретінін күтуде.
Бұл жағдайға Сауд Арабиясының егеменді инвестициялық қорының саясаты себеп болып отыр. Аталған қор елдегі төрт ірі клубты — «Әл-Насрды», «Әл-Хилялды», «Әл-Иттихадты» және «Әл-Ахлиді» — бірдей басқарады. Роналдудың пікірінше, осы клубтардың ішінде «Әл-Наср» трансферлік саясатта бәсекелестерінен қалып қойып отыр. Ол құрамды күшейту мәселесінде жеткілікті қадамдар жасалмай жатқанын және бұл чемпиондық үшін күреске тікелей әсер ететінін атап өтеді.
Дереккөздер Роналдудың Сауд Арабиясы Про-лигасының 20-туры аясындағы «Эр-Риядқа» қарсы матчқа қатыспауын дәл осы наразылықпен байланыстырады. Аталған ойын «Әл-Насрдың» 1:0 есебімен жеңісімен аяқталған. Футболшының денсаулығында мәселе болмағаны айтылып отыр. Соған қарамастан, Роналду Сауд Арабиясындағы мақсаттарынан бас тартқан жоқ. Ол ел чемпионатындағы алғашқы титулын жеңіп алуды және кәсіби мансабында 1000 гол шегіне жетуді басты межелердің бірі ретінде сақтап отыр.
Криштиану Роналду «Әл-Наср» сапында 2023 жылдан бері ойнап келеді, ал оның клубпен келісімшарты 2027 жылға дейін жарамды. Осы уақыт ішінде ол барлық турнирде 127 матч өткізіп, 111 гол соғып, 22 нәтижелі пас берген. Сонымен қатар Роналду 2034 жылы Сауд Арабиясында өтетін әлем чемпионатының ресми елшісі болуға келісім берді, бұл оның жергілікті футболды дамытуға үлес қосуға дайын екенін көрсетеді. Қазір «Әл-Наср» 20 турдан кейін 46 ұпаймен екінші орында тұр және «Аль-Хилялдан» небәрі бір ұпайға қалып келеді. Алдағы кезеңде осы жағдай португалиялық жұлдыздың болашағына тікелей әсер етуі мүмкін.
Айбар Рысдаулет
Алматы 2029 жылғы Қысқы Азия ойындарының қабылдаушы қаласы болып бекітілді
Қазақстандық шорт-трекші жасөспірімдер арасындағы әлемдік рекорд орнатты