Қазақстандық дзюдошылар Олимпиада жолын Моңғолиядағы турнирден бастайды
Фото: Eurosport
Улан-Баторда өтетін Grand Slam турнирі Қазақстан дзюдошылары үшін 2028 жылғы Лос-Анджелес Олимпиадасына іріктеу кезеңінің бастамасы болады, деп хабарлайды Pin-UpSport.kz.
Моңғолия астанасындағы жарыс 19-21 маусым аралығында өтеді. Турнирде Қазақстан құрамасының атынан 20 спортшы татамиге шығады.
Құрама сапына ұлттық команданың көшбасшылары Нұрқанат Серікбаев, Мағжан Шамшадин, Галия Тынбаева және Камила Берлікаш енді. Олар Олимпиада рейтингіне қажетті ұпайлар үшін күресті бастайды.
Қазақстан құрамасының келесі халықаралық жарысы 26-28 маусым күндері Қытайдың Циндао қаласында өтетін Гран-при турнирі болады.
Қытайдағы турнирдің басты оқиғаларының бірі — Париж Олимпиадасының чемпионы Елдос Сметовтің татамиге қайта оралуы болмақ. Сонымен қатар Қазақстан құрамасының өтініміне Гусман Кыргызбаев пен Әбиба Әбужақынова да енгізілді.
