«Қазақ патшасы» әлемдік рейтингте көтерілді
Султан Заурбек. Фото: Getty Images
Қазақстандық боксшы Сұлтан Заурбек Астанада өткен бокс кешінде жарқырай көзге түсіп, BoxRec рейтингінде өз орнын жақсартты. «Қазақ патшасы» деген атпен танылған спортшы Оңтүстік Африка өкілі Азинга Фузилені төрешілердің бірауызды шешімімен жеңіп шықты.
Бұл кездесу IBF Inter-Continental белбеуі үшін болған. Сұлтан осы жекпе-жектен кейін екінші жартылай жеңіл салмақта әлемдік рейтингте бірден 21-орыннан 11-ге көтерілді.
Астанадағы бокс кешінің басты жекпе-жегінде Жәнібек Әлімханұлы франциялық қарсыласы Анауэль Нгамиссенгені бесінші раундта нокаутқа түсіріп, орта салмақтағы WBO және IBF чемпиондық белбеулерін сәтті қорғап қалды.
Сұлтан Заурбектің бұл жеңісі оны әлемдік аренадағы үлкен айқастарға бір табан жақындатты. Енді ол ТОП-10-ға кіруге өте жақын тұр.
