Қазақ боксшы қыздары тарихи жетістікке жетіп, қомақты сыйақы алды
Назым Кызайбай
Назым Қызайбай, Алуа Балкибекова және Аида Әбікеева Сербияның Ниш қаласында өткен әйелдер арасындағы әлем чемпионатында топ жарып, ел қоржынына алтын медаль салды. Осы жеңістері үшін әрбір спортшы 115 000 доллардан алады.
Биылғы әлем чемпионатында алғаш рет тек жүлдегерлер ғана емес, ширек финалға шыққан спортшылар да ақшалай сыйақы алды. Алтын медаль иегерлеріне – 100 000, күміске – 50 000, қоладан – 25 000, ал ширек финалға жеткендерге 10 000 доллардан берілді.
Сонымен қатар, Қазақстанда олимпиадалық спорт түрлерінен әлем чемпиондарына қосымша сыйақы қарастырылған. Алтын алғандарға – 15 000, күміске – 7 000, ал қола жүлдегерлерге – 5 000 доллар беріледі.
Қазақстандық боксшылар үш алтыннан бөлек, екі күміс пен бір қола медаль жеңіп алып, ұлттық бокс тарихындағы ең сәтті көрсеткіштердің біріне қол жеткізді.
