Бибісара Асаубаева әлем чемпионын жеңгеніне пікір білдірді
Фото: NurPhoto
Қазақстандық шахматшы Бибісара Асаубаева Ослода өтіп жатқан Norway Chess Women-2026 турнирінде әлем чемпионы Цзюй Вэньцзюньді жеңгеннен кейін өз әсерімен бөлісті, деп хабарлайды Pin-UpSport.kz.
Турнирдің төртінші турында қазақстандық шахматшы мен Қытай өкілі арасындағы негізгі партия тең аяқталды. Кейін жеңімпаз «армагеддон» форматындағы қосымша партияда анықталып, онда Бибісара басым түсті.
Осы нәтижеден кейін қазақстандық спортшы жеті ұпай жинап, турнир кестесіндегі көшбасшылық орнын сақтап қалды.
Матч аяқталған соң Бибісара әлеуметтік желіде өз ойымен бөлісті.
«Сәлем, достар! Классикалық партияны тең аяқтадым, ал „армагеддонда“ жеңіске жеттім. Меніңше, бұл осы турнирдегі ең сапалы „армагеддоным“ болды. Оның үстіне, қарсыласым қазіргі әлем чемпионы еді», — деді шахматшы.
Сондай-ақ Асаубаева бұған дейін Цзюй Вэньцзюньмен рапид форматында кездесіп, ол ойында да жеңіске жеткенін атап өтті.
Norway Chess-2026 әйелдер турнирі Ослода өтуде. Жарысқа алты шахматшы қатысып, екі айналымдық жүйе бойынша бақ сынауда. Турнир 5 маусымда аяқталады.
