Асу Алмабаев Бекзат Алмаханды қолдап сөз сөйледі
Бекзат Алмахан. Фото: bekzatalmahan/Instagram
Қазақстандық UFC файтері Асу Алмабаев Бакуде өткен UFC Fight Night турнирінен кейін жерлесі Бекзат Алмаханды қолдап пікір білдірді, деп хабарлайды Pin-UpSport.kz. Оның айтуынша, әлемдегі ең беделді промоушенге дейін жетудің өзі үлкен еңбек, сондықтан бір жеңіліске қарап спортшының еңбегін жоққа шығаруға болмайды.
Асу Алмабаев турнир алдындағы дайындық барысында екеуінің бірге жаттыққанын айтты. Оның сөзінше, Бекзат Алмахан Бакуге жекпе-жекке он күн қалғанда келген, ал өзі бұл қалада үш апта бойы дайындалған. Соған қарамастан, қазақстандық файтерлер әріптестеріне барынша көмектесуге тырысқанын жеткізді.
«Біз дәл осы Бакуде бірге салмақ қудық, бір залда жаттықтық. Ол мұнда жекпе-жекке он күн қалғанда келді. Ал біз үш апта бұрын келгенбіз. Біз қолдан келгенше көмектестік, өйткені біз бауырмыз. Қалай болды, солай болды. Жеңіліс туралы әртүрлі пікір айтуға болады. Бірақ ең маңыздысы – октагонға шығу, UFC-ге жету және өзіңді көрсету. Бұл үлкен еңбек. Бекзатты сынайтындар табылады. Бірақ ол – нағыз еңбекқор спортшы. Ол отбасы үшін маңдай терімен еңбек етіп жүр. Қолынан келгеннің бәрін жасады. Жеңіліс спортта болады. Ертең дәл солай мен де жеңіліп қалуым мүмкін. Ертең не боларын ешкім білмейді», – деді Алмабаев Namys Fighting арнасына берген сұхбатында.
Бакудегі UFC Fight Night турнирінде Бекзат Алмахан жеңіл салмақта бразилиялық Жан Мацумотодан төрешілердің бірауызды шешімімен жеңілді. Ал Асу Алмабаев негізгі кардта америкалық Чарльз Джонсонды үшінші раундта сабмишен әдісімен жеңді. Осы жеңілістен кейін Бекзат Алмаханның кәсіпқой мансабындағы көрсеткіші 12 жеңіс пен 4 жеңіліске тең. UFC аясында ол төрт жекпе-жек өткізіп, бір рет жеңіске жетті.
Айбар Рысдаулет
Килиан Мбаппе ӘЧ-2026 мергендер жарысында Лионель Мессиге жетті
Дәурен Ермеков ACA 205 турнирінде жекпе-жек өткізеді