Жәнібек пен Төрехан таразыдан сүрінбей өтті – Астанадағы үлкен айқасқа бәрі дайын
Жанибек Алимханулыж. Фото: Getty Images
Астанада кәсіпқой бокс кешінің алдында салмақ өлшеу рәсімі өтті. Бұл шоу – елдегі жанкүйерлер көптен күткен айтулы оқиғалардың бірі. Бас боксшылар – орта салмақтағы WBO мен IBF тұжырымдары бойынша әлем чемпионы Жәнібек Әлімханұлы мен жеңіліп көрмеген француз Анауэль Нгамиссенге салмақ лимитінен асқан жоқ. Жәнібектің салмағы – 72,35 келі, ал қарсыласы – 72,05 келі.
Кештегі барлық жекпе-жектердің құрамы да ресми түрде бекітілді. Басты айқастар қатарында Сұлтан Заурбек, Батыр Жүкембаев пен Балауса Мұздыман жұдырықтасады. Сонымен қатар, кәсіпқой рингтегі алғашқы жекпе-жектеріне шығатын Махмұд пен Төрехан Сабырхан да назарда. Айта кету керек, Махмұдтың қарсыласы өзгеріп, енді ол Вьетнамдық Данг Дак Хайнхпен қолғап түйістіреді.
Барлық қатысушы боксшылар өз салмақ дәрежесінің талаптарына толық сай болды. Бұл кеште Қазақстаннан бөлек, Өзбекстан, Франция, Оңтүстік Африка, Украина, Филиппин, Чехия, Вьетнам және Үндістаннан келген спортшылар өнер көрсетеді. Рингке шығатындар қатарында әлем чемпиондары да, кәсіби рингтегі алғашқы қадамдарын жасайтын жас таланттар да бар.
Астанадағы басты бокс кеші 5 сәуір күні «Барыс Аренада» өтеді. Жекпе-жектердің басталуы – Астана уақытымен сағат 20:00-де.
Айбар Рысдаулет
Тікелей жолдамадан қағылған футзалдан Қазақстан құрамасы ФИФА рейтингінде төмендеді
Астанадағы айқас: үш қазақ боксшысы – үш титул