Қазақстандық боксшылар өзбек чемпиондарын рингке шығармай «жеңді»
Федерация бокса Узбекистана
Софияда (Болгария) өтіп жатқан «Кіші әлем чемпионаты» саналатын Странджа-2025 турнирінде өзбек боксшылары Абдумәлік Халоков пен Асадхожа Муйдинхожаев жекпе-жекке шыға алмады. Бұл туралы Өзбекстан бокс федерациясы хабарлады.
Халоков 1/8 финалда 60 келі салмақта қазақстандық Серік Теміржановпен кездесуі керек еді. Алайда кәсіби мансабындағы екінші жекпе-жегінің мерзімі өзгергендіктен, спортшы Испанияға аттанып, турнирге қатысудан бас тартты.
Ал Муйдинхожаев 67 келіге дейінгі салмақта Төрехан Сабырханға қарсы шығуы тиіс болатын. Алайда жарыс алдында алған жарақатынан толық айыға алмағандықтан, ол да шаршы алаңға шықпады.
Осылайша, қазақстандықтар — Серік Теміржанов пен Төрехан Сабырхан — қарсыластарымен кездеспей-ақ ширек финалға жолдама алды. Ал алғашқы жарыс күнінде Өзбекстан атынан тек Самандар Олимов қана рингке шықты.
