Әлімханұлы IBF шешіміне апелляция бермек
Жанибек Алимханулы. Фото: nur.kz
Қазақстандық боксшы Жәнібек Әлімханұлы Халықаралық бокс федерациясының оны орта салмақтағы IBF чемпионы атағынан айыру туралы шешіміне қатысты пікір білдірді, деп хабарлайды Pin-UpSport.kz. Спортшының командасы бұл шешімге шағым түсіруді жоспарлап отыр.
Қазақстан кәсіби бокс федерациясының президенті Рахымжан Ерденбековтің айтуынша, Әлімханұлының командасы ұйымның шешіміне апелляция бермек. Оның сөзінше, боксшының өкілдері бұл мәселе бойынша ресми түрде өтініш жолдап, шешімді қайта қарауды талап етеді.
Бұған дейін Халықаралық бокс федерациясы ресми мәлімдеме жариялап, қазақстандық боксшыны чемпиондық белбеуден айыру себебін түсіндірген болатын. Жәнібек Әлімханұлы IBF белбеуін 2023 жылдың қазан айында неміс боксшысы Винченцо Гуальтьериді нокаутпен жеңіп, иеленген еді. Сондай-ақ ұйым қазақстандық спортшыны 2026 жылдың желтоқсанына дейін дисквалификациялағанын хабарлады.
Осыған дейін бұл жағдай бойынша шешімді Дүниежүзілік бокс ұйымы да шығарған. WBO да Әлімханұлын бір жылға шеттеткенімен, оның орта салмақтағы чемпиондық титулын сақтап қалды. Бұл жағдайға допингке байланысты дау себеп болды: желтоқсан айында қазақстандық боксшының сынамасынан тыйым салынған мельдоний препараты анықталған. Соның салдарынан WBA чемпионы кубалық Эрисланди Лараға қарсы жоспарланған жекпе-жек өткізілмей қалды. Кейін екінші сынаманың нәтижесі де тыйым салынған заттың бар екенін растағаннан кейін ресми тергеу басталған.
Айбар Рысдаулет
Бублик Монте-Карлода өтетін ATP Masters 1000 турниріне қатысады
Гризманн МЛС-ке ауысу туралы қауесеттерге пікір білдірді