Жекеменшікке өткен «Ордабасы» атауын өзгертуі мүмкін
Фото: ФК Ордабасы
Шымкент қаласының «Ордабасы» футбол клубы жақын уақытта атауын өзгерту мүмкіндігін қарастырып жатыр, деп хабарлайды Pin-UpSport.kz. Журналист Олжас Байбосынның мәліметінше, команда халықаралық деңгейде танымал болу мақсатында атауын ағылшын тіліне бейімдеуді жоспарлауы мүмкін.
Журналистің айтуынша, клуб басшылығы атауды еуропалық аудиторияға түсінікті әрі қолайлы ету мәселесін талқылап жатыр. Мұндай тәжірибе халықаралық аренада жиі кездеседі, себебі көптеген клубтар өз брендін шетелде де танымал етуге ұмтылады. Айта кету керек, шымкенттік команда бұған дейін де қысқа уақытқа атауын өзгерткен. Клуб бір маусым бойы «Ордабасы Юнайтед» атауымен өнер көрсеткен болатын.
Клуб атауын өзгерту мәселесі жуырда болған меншік иесінің ауысуымен де байланысты болуы мүмкін. Биылғы 16 ақпанда «Ордабасы» қазақстандық кәсіпкер Шахмурат Муталиптің меншігіне өтті. Ол сонымен қатар Қазақстан бокс федерациясының президенті қызметін атқарады. Жаңа басшы клубты дамытуға бағытталған бірқатар жоспарлар бар екенін айтып, алдағы маусымда команда чемпиондыққа таласуды мақсат ететінін мәлімдеді.
Өткен маусымда Қазақстан Премьер-Лигасында «Ордабасы» 35 ұпай жинап, турнирлік кестеде жетінші орынға тұрақтаған еді. Қазіргі уақытта клуб басшылығы команданың даму стратегиясына қатысты түрлі өзгерістерді қарастырып жатыр. Бұл өзгерістер ұйымдық құрылымға да, клубтың имидждік бағытына да әсер етуі мүмкін. Алайда атауды өзгерту туралы нақты шешім әлі ресми түрде жарияланған жоқ.
Айбар Рысдаулет
«Барыс» плей-оффқа шығу мүмкіндігінен айырылды
Ханси Фликтің «Барселонадағы» болашағы клуб президенті сайлауына байланысты