Боранбаев «Қайраттың» Чемпиондар лигасындағы тарихи маусымын қорытындылады
Фото: Arsenal FC
Алматылық «Қайрат» футбол клубының Бақылау кеңесінің төрағасы Қайрат Боранбаев УЕФА Чемпиондар лигасының 2025/26 маусымындағы өнер көрсетудің қорытындысын әлеуметтік желідегі ресми мәлімдеме арқылы жариялады, деп хабарлайды Pin-UpSport.kz.
Бұл пікір «Қайраттың» Лондон қаласында ағылшынның «Арсенал» клубына қарсы өткізген соңғы матчынан кейін айтылды. Аталған кездесуде алматылық команда 2:3 есебімен жеңіліп, жалпы кезеңді бір ұпаймен 36-орында аяқтады. Осы маусым «Қайрат» үшін Чемпиондар лигасының негізгі кезеңіндегі алғашқы тәжірибе ретінде тарихта қалды.
Қайрат Боранбаев бұл жетістіктің ел футболы үшін маңызын ерекше атап өтті.
«„Қайрат“ Қазақстанда жекеменшік клубтар арасында алғаш рет турнирдің негізгі кезеңіне өтіп, Еуропаның ең мықты 36 клубының қатарына кірді. Қазіргі мүмкіндіктерімізді ескерсек, бұл — шынайы бәсекелі ортада өз деңгейімізді сезінуге және болашаққа маңызды қорытынды жасауға мүмкіндік берген елеулі нәтиже», — деді ол.
Оның айтуынша, бұл маусым клубтың әрі қарай дамуына бағыт-бағдар беретін маңызды кезең болды. Сондай-ақ клуб басшысы «Қайрат» академиясының түлектеріне арнайы тоқталды. Ол жас ойыншылардың Чемпиондар лигасында негізгі құрамда алаңға шығуын маңызды қадам ретінде бағалады. Дастан Сатпаев пен Темірлан Анарбековтың ойыны ерекше аталды.
«Олар алаңға шығып, жауапкершілікті өз мойнына алды, әлемдік басылымдардың шолулары мен талдауларына енді», — деп атап өтті Боранбаев. Бұл тәжірибе жас футболшылардың кәсіби тұрғыда өсуіне үлкен әсер ететіні айтылды.
Мәлімдемеде мадридтік «Реалмен» Алматыда өткен матч та бөлек сөз болды. Бұл кездесу қазақстандық клубқа бұрын-соңды болмаған назар аудартты.
«Қазақстандық клубқа ешқашан мұндай деңгейде қызығушылық болған емес. Бұл — еліміздің футболы әлемдік аудитория үшін қаншалықты тартымды бола алатынын көрсеткен ең маңызды нәтижелердің бірі», — деді Боранбаев.
Ол жанкүйерлерге қолдауы үшін алғыс айтып, клубтың алдағы уақытта да өз тәрбиеленушілеріне сенім артып, сол бағытта дамуды жалғастыратынын жеткізді.
Айбар Рысдаулет
«Қайрат» Лондонда «Арсеналға» есе жіберіп, Чемпиондар лигасындағы өнерін аяқтады
Анна Данилина Australian Open турнирінің финалына алғаш рет жолдама алды