Асхат Тағыберген «Тобылмен» келісімшартын ұзартты
Фото: КФФ
Қазақстан ұлттық құрамасының бұрынғы капитаны Асхат Тағыберген алдағы маусымда да Қостанайдың «Тобыл» футбол клубының намысын қорғайды, деп хабарлайды Pin-UpSport.kz.
Тараптар жаңа келісімшартқа қол қойып, тәжірибелі жартылай қорғаушыны команда құрамында сақтап қалу жөнінде ортақ шешімге келді. Бұл қадам клубтың тұрақтылықты сақтауға және тәжірибелі ойыншыларға сенім артуға бағытталған саясатын айқын көрсетеді.
Маусым басында Асхат Тағыберген шымкенттік «Ордабасы» сапында өнер көрсеткен еді. Алайда чемпионат барысында клуб ауыстыруына тура келді. Бұған өңір әкімі Ғабит Сыздықбековтің футболшының жалақысына қатысты айтқан мәлімдемесі себеп болды. Бұл жағдай қоғамда кеңінен талқыланып, бұқаралық ақпарат құралдарында үлкен резонанс тудырды. Соның нәтижесінде тараптар ынтымақтастықты тоқтату туралы шешім қабылдап, жартылай қорғаушы маусымды «Тобыл» құрамында жалғастырды.
Қостанайлық клуб сапында Тағыберген барлық турнирлерде 21 матч өткізіп, екі гол соғып, екі нәтижелі пас авторы атанды. Сонымен қатар ол алаң ортасындағы ойынның ұйымдастырылуына елеулі үлес қосып, команданың тактикалық құрылымында маңызды рөл атқарды. Маусымның басты жетістігі ретінде «Тобылдың» Қазақстан Кубогын жеңіп алуын атап өтуге болады. Бұл трофей команда үшін де, ойыншы үшін де маусымның сәтті аяқталғанын білдірді.
Асхат Тағыбергенмен келісімшарттың ұзартылуы клуб үшін стратегиялық маңызға ие шешім саналады. Бұған дейін футболшы Солтүстік Македонияға қарсы матчтан кейін Қазақстан ұлттық құрамасындағы мансабын ресми түрде аяқтағанын жариялаған болатын. Енді ол барлық назарын клубтық деңгейдегі мақсаттарға аударып, «Тобылдың» алдағы маусымдардағы міндеттерін орындауға күш салмақ.
Айбар Рысдаулет
Аян Тұрсын АҚШ-та чемпиондық белбеу үшін жекпе-жек өткізеді
«Барыс» ҚХЛ-дағы матчта «Тракторға» жол берді