Энтони Джошуа Майамиде Джейк Полды нокаутқа жіберді
Фото: The Mirror
20 желтоқсанда АҚШ-тың Майами қаласында америкалық блогер әрі кәсіби боксшы Джейк Пол мен бұрынғы әлем чемпионы Энтони Джошуа арасында бокс кешінің басты жекпе-жектерінің бірі өтті, деп хабарлайды Pin-UpSport.kz. Бұл кездесу тәжірибе мен медиялық танымалдықтың қақтығысы ретінде бағаланып, жанкүйерлердің ерекше назарын аударды.
Жекпе-жек толықтай британдық боксшының бақылауында өтті. Энтони Джошуа алтыншы раундта қарсыласын нокаутпен жеңіп, айқын басымдық танытты. Кездесу барысында ол рингтің ортасын иемденіп, соққыларын дәл жеткізіп отырды және бірнеше мәрте Джейк Полды нокдаунға жіберді. Джошуаның тәжірибесі мен тактикалық сауаттылығы айқастың тағдырын ертерек шешуге мүмкіндік берді.
Бұл жекпе-жек Джейк Пол үшін кәсіби мансабындағы кезекті маңызды сынақ болды. Америкалық спортшы бокста белсенді өнер көрсетіп жүргенімен, оның қарсыластарының деңгейі жиі талқыланып келеді. Майамидегі айқасқа дейін Пол кәсіби рингте 14 рет жұдырықтасып, 12 жеңіс пен екі жеңіліске ие болған еді. Алайда бұл жолы ол суперауыр салмақтағы тәжірибелі қарсыласқа төтеп бере алмады.
Ал Энтони Джошуа өзінің жоғары класын тағы бір мәрте дәлелдеді. Британдық боксшы кәсіби мансабында 33 жекпе-жек өткізіп, 29 рет жеңіске жеткен. Джейк Полды нокаутпен жеңу Джошуа үшін алдағы ірі кездесулерге жол ашуы мүмкін. Алдағы уақытта оның келесі қарсыласы мен жоспарлары жөнінде қосымша ақпарат жарияланады деп күтілуде.
Айбар Рысдаулет
Дияр Нұрғожайдың UFC-дегі келесі қарсыласы белгілі болды
Килиан Мбаппе техникалық демеушісін ауыстыруы мүмкін