Марокко жастар құрамасы алғаш рет әлем чемпионы атанды

Чилидің Сантьяго қаласында өткен 2025 жылғы жастар арасындағы әлем чемпионатының финалында Марокко құрамасы Аргентинаны 2:0 есебімен ұтып, тарихи жеңіске жетті, деп хабарлайды Pin-UpSport.kz. Бұл — Африка құрлығы үшін де, Марокко футболы үшін де тұңғыш әлемдік титул.

Финалдың басты кейіпкері 20 жастағы шабуылшы Яссир Забири болды. Ол алғашқы таймда-ақ екі гол соғып (19 және 29-минуттар), командасына шешуші артықшылық сыйлады. Осы дубль Марокконы жастар арасындағы әлем чемпионы атандырды.

Кездесу Сантьягодағы әйгілі «Насьональ — Хулио Мартинес Праданос» стадионында өтті. Алты мәрте әлем чемпионы атанған Аргентина бұл жолы қарсыласының шабуылына төтеп бере алмай, күтпеген жеңіліске ұшырады.

Бұған дейінгі чемпионатта Уругвай жеңімпаз болған еді. Ал бұл жолы футбол тарихы жаңа парақтан басталды — Марокко жастар құрамасы әлемдік футболда Африканың атын биікке көтеріп, тұңғыш рет әлем чемпионы атанды.