Жағажай футболынан Қазақстан құрамасы тарихи нәтиже қол жеткізді

Италияның Кастелламмаре ди Стабиа қаласында өткен турнирде Қазақстан құрамасы В дивизионында Румыния, Норвегия және Мальта командаларымен кездесті. Үш ойынның үшеуінде де қарсыластарынан басым түскен ұлттық құрама Элиталық дивизионға өтуге мүмкіндік беретін промо-финалға жолдама алды.

Турнирдің алғашқы ойынында Қазақстан құрамасы Румыниямен кездесіп, 3:2 есебімен жеңіске жетті. Бұл матчта құрама сапынан Деринг, Маликов және Кайзер мергендігімен көзге түсті.

Екінші турда Қазақстан Норвегияға қарсы алаңға шығып, тартысты өткен ойында 6:4 есебімен басым түсті. Біздің құрама сапынан Кайзер дубль авторы атанса, Деринг, Құрбанов, Шевчук және Мыңбаев бір-бір голдан соқты.

Топтық кезеңнің шешуші үшінші матчында Қазақстан құрамасы Мальта құрамасымен кездесіп, 5:4 есебімен жеңіске жетті. Бұл нәтижеден кейін Қазақстан 9 ұпаймен топта бірінші орын алып, Элиталық дивизионға жолдама беретін финалдық кезеңге жолдама алды.

Қыркүйек айында өтетін промо-финал кезеңіндегі Қазақстан құрамасының қарсыластары кейінірек белгілі болады.

Жағажай футболынан Қазақстан ұлттық құрамасының ойыншылар тізімі:

Қақпашылар: Дастамиден Дагиев («Арман»), Дмитрий Бровко («Barqy»);

Қорғаушылар: Игорь Демешко, Михаил Кайзер (екеуі де – «Арман»), Әбдіқадыр Құрбанов («Омега»), Нұрдәулет Болатбек («Малайсары»);

Шабуылшылар: Айдын Маликов («Малайсары»), Артур Деринг, Нұрлан Жүнісов (екеуі де – TK B&A), Арман Шотанов («Barqy»), Владислав Шевчук, Алан Мыңбаев (екеуі де – «Арман»);