Виктор Друзин әлем кубогының суперфиналында күміс медаль жеңіп алды
Қазақстандық спортшы Виктор Друзин Канаданың Торонто қаласында өтіп жатқан артистік жүзуден әлем кубогының суперфиналында күміс жүлдегер атанды, деп хабарлайды Pin-UpSport.kz. Ұлттық құраманың өкілі ерлер арасындағы еркін бағдарламада үздік нәтиже көрсетіп, тұғырдың екінші сатысына көтерілді.
Еркін бағдарлама бойынша өткен жарыста Друзин 248,5525 ұпай жинады. Бұл нәтиже оған күміс медаль иеленуге мүмкіндік берді. Алтын жүлдені 255,9600 ұпаймен Ұлыбритания өкілі Ранджуо Томблин жеңіп алды. Үздік үштікті 246,2639 ұпай жинаған Италия спортшысы Филиппо Пелати түйіндеді.
Айта кетейік, бұл Виктор Друзиннің аталған турнирдегі екінші жүлдесі болды. Бұған дейін қазақстандық спортшы техникалық бағдарламада қола медаль жеңіп алып, ел қоржынына тағы бір марапат салған еді.
Артистік жүзуден әлем кубогының суперфиналы 21 маусымға дейін жалғасады. Турнирге іріктеуден өткен 22 елдің 156 үздік спортшысы қатысуда. Қазақстан намысын бұл жарыста 14 спортшы қорғап жатыр.
