Үш жылдан кейін оралған Ержан Залилов даулы жекпе-жекте жеңіліп қалды
Ержан Залилов. Фото: RCC Boxing
Қазақстандық боксшы Ержан Залилов (13-4-2, 7 KO) үш жылдық үзілістен кейін қайта рингке шықты. Ол Тәжікстан астанасы Душанбе қаласында өткен IBA.PRO 6 бокс кешінде жергілікті нокаут шебері Акмаль Убайдовпен (5-0, 5 KO) кездесіп, алты раундтық жекпе-жекте бақ сынады.
Жекпе-жек 57,2 келі салмақта өтті. Төрешілердің бірауызды шешімімен жеңіс Убайдовқа берілді. Алайда төртінші раундта даулы жағдай тіркелді — рефери екеуін ажыратпақ болған сәтте Убайдов Залиловтың басына ауыр соққы жасады. Ержанға қалпына келу үшін бес минут уақыт қажет болды, ал қарсыласынан бір ұпай шегерілді.
Осылайша, Убайдов кәсіби мансабындағы алтыншы жеңісіне қол жеткізді. Ал Залилов бесінші рет жеңіліп отыр. Айта кетейік, Ержан бұған дейін Қазақстан кәсіпқой бокс федерациясының чемпионы атанған.
