Сәтсіз өнер көрсеткен «Жеңістің» бас бапкері қызметінен кетті
Акис Вавалис. Фото: QFL.kz
«Жеңіс» футбол клубының бас бапкері Акис Вавалис қызметінен кетті. Бұл туралы клуб директоры Айдын Қожахмет мәлімдеді. Оның айтуынша, грек маманы жақын туысының денсаулығына байланысты елге оралмақ.
Қожахмет Вавалиске өткен маусымдағы еңбегі үшін алғыс айтты. Сондай-ақ, клуб тарапынан оған сенімнің жоғалмағанын атап өтті. Қазіргі уақытта команда тізгінін уақытша Пиралы Алиев ұстайды.
Акис Вавалис – Қазақстан Премьер-лигасында жұмыс істеген алғашқы грек бапкер. Ол 2024 жылдың мамырында «Жеңіске» келген кезде команда турнир кестесінде соңғы орында тұрған еді. Маусым соңында елордалық клуб 10-орынмен бірінші лигаға түсіп қалудан аман қалды және Лига кубогының финалына дейін жетті.
Бұған дейін Вавалис Грекия, Швеция, Болгария мен Косово клубтарында жұмыс істеген.
