Руслан Мадиев Бангкокта WBA Asia белдігін қорғайды
Руслан Мадиев. Фото: LightRocket via Getty Images
4 қазан күні Таиланд астанасы Бангкокта жартылай орта салмақта WBA Asia чемпионы атағы үшін жекпе-жек өтеді. Бұл кештің басты оқиғаларының бірі – қазақстандық Руслан Мадиевтің (17-2-1, 6 KO) шаршы алаңға шығуы. Ол өз белдігін жеңілмеген намибиялық боксшы Абед Шиконгоға (11-0-1, 6 KO) қарсы қорғайды.
Жекпе-жек он раундқа жоспарланған. Кездесудің алдында қос спортшы да ресми өлшеу рәсімінен өтіп, 66,7 келі (147 фунт) салмақ шегінен асқан жоқ. Салмақ өлшеуден соң дәстүрлі көз арбасу рәсімі өтіп, айқас алдындағы қызу тартыс сезілді.
Бұл Мадиев үшін маңызды кездесу болмақ. Себебі ол 7 маусымда Испанияның Льорет-де-Мар қаласында мексикалық Хорхе Баталья Мартинеспен (11-5-1, 7 KO) күш сынасып, жекпе-жек тең аяқталған еді. Енді қазақ боксшысы қайтадан жеңісті жолға оралуды көздеп отыр.
