«Қайрат» Лондонда «Арсеналға» есе жіберіп, Чемпиондар лигасындағы өнерін аяқтады
Фото: Arsenal FC
Алматылық «Қайрат» футбол клубы УЕФА Чемпиондар лигасының 2025/26 маусымындағы жалпы кезеңнің соңғы турында Лондонда ағылшындық «Арсеналдан» жеңіліп қалды, деп хабарлайды Pin-UpSport.kz.
Кездесу «Эмирейтс» стадионында өтіп, қазақстандық команда үшін турнирдегі соңғы матч болды. Нәтижесіне қарамастан, бұл ойын «Қайрат» үшін маңызды тәжірибе саналады, себебі алматылықтар Еуропаның алпауыт клубтарының бірімен тең дәрежеде бақ сынады.
«Қайраттың» Чемпиондар лигасының жалпы кезеңіне шығуы клуб тарихындағы ерекше белес болды. Алматылық ұжым алғаш рет осы сатыға жетіп, бүкіл турнир барысында Қазақстанның намысын қорғады. Соңғы турдағы қарсылас «Арсенал» болатын. Лондондық клуб бұл кезеңде барлық матчта жеңіске жетіп, тұрақты әрі нәтижелі ойын көрсетіп келді. Сондықтан бұл кездесу «Қайрат» үшін үлкен сынақ саналды.
Ойын өте жылдам басталды. Үшінші минутта «Арсенал» сапынан Виктор Дьекереш есеп ашты. Алайда «Қайрат» тез жауап қайтарды. Жетінші минутта Жоржинью өзі тапқан пенальтиді сәтті орындап, таразы басын теңестірді. Бірінші тайм аяқталғанға дейін алаң иелері тағы екі мәрте көзге түсті. Кай Хаверц пен Габриэл Мартинеллидің голдары «Арсеналға» басымдық сыйлады. Екінші таймда ойын қарқыны сәл бәсеңдеді. Қосымша уақытта Рикардиньо Валерий Громыконың пасынан кейін гол соғып, есепті қысқартты. Дегенмен матч 3:2 есебімен аяқталды.
Жалпы кезең қорытындысы бойынша «Қайрат» бір ұпаймен 36-орынға тұрақтап, Чемпиондар лигасындағы өнерін аяқтады. Алматылықтар жалғыз ұпайды «Пафоспен» өткен үйдегі ойында еншіледі. Ал «Арсенал» барлық сегіз матчта жеңіске жетіп, бірінші орынмен 1/8 финалға тікелей жолдама алды. Бұл маусым «Қайрат» үшін халықаралық деңгейде маңызды тәжірибе болып, алдағы даму жолына негіз қалады.
Айбар Рысдаулет
Қамшыбек Қоңқабаев кәсіби боксқа қайта оралуы мүмкін
Боранбаев «Қайраттың» Чемпиондар лигасындағы тарихи маусымын қорытындылады