Лионель Месси Майамиде халықаралық жасөспірімдер турнирін өткізеді
Фото: Athlon Sports
Аргентина құрамасының капитаны әрі «Интер Майами» клубының шабуылшысы Лионель Месси жаңа футбол жобасын – «Месси кубогы» атты жасөспірімдер турнирін таныстырды, деп хабарлайды Pin-UpSport.kz.
Жеті дүркін «Алтын доп» иегері бұл бастама туралы өз әлеуметтік желілерінде хабарлаған.
Турнир желтоқсанның 9-14 күндері Майами қаласында өтеді. Жарысқа әлемнің үздік академиялары қатыспақ. Қатысушылар қатарында 16 жасқа дейінгі командалар бар: «Ривер Плейт», «Ньюэллс Олд Бойз», «Интер Майами», «Барселона», «Атлетико», «Челси», «Манчестер Сити» және «Интер».
Мессидің бастамасымен ұйымдастырылған бұл турнирдің басты мақсаты – жас футболшылардың дамуына жол ашу және әр елдің академиялары арасындағы тәжірибе алмасуға мүмкіндік беру.
Лионель Месси 2023 жылдан бері «Интер Майами» сапында өнер көрсетіп келеді. Бұған дейін ол ұзақ жылдар бойы «Барселонада» ойнаған, кейін Пари Сен-Жермен клубының намысын қорғаған.
