Хакими Африка кубогындағы даулы финалдан кейін жүлдеден бас тартты
Morocco World News
«ПСЖ» клубының және Марокко құрамасының қорғаушысы Ашраф Хакими Африка кубогы-2025 турнирі аяқталғаннан кейін өзіне берілген трофейден бас тартатынын мәлімдеді, деп хабарлайды Pin-UpSport.kz. Футболшы бұл шешімін финал нәтижесі қайта қаралғаннан кейін түсіндірді.
Хакимидің айтуынша, бұл қадамға оны отбасы ықпал еткен және ол мұндай жағдайда жүлдені қабылдауды дұрыс деп санамайды. «Анам маған бұл трофейден бас тартуымды айтты. Мен ресми түрде одан бас тартамын және командадағы серіктестерім де осылай жасайды деп үміттенемін. Бізде жеңіске жетуге мүмкіндік болды, бірақ оны пайдалана алмадық. Футболда осылай болады, бүгін жеңесің, ертең жеңілесің. Конфедерацияның шешіміне құрметпен қараймын, бірақ бұл трофейді өзімдікі деп есептей алмаймын. Мен Африка кубогы-2025-ті жеңген жоқпын. Сенегалды құттықтаймын», — деді футболшы.
Финал төңірегіндегі дау матч нәтижесінің қайта қаралуынан кейін туындады. Африка футбол конфедерациясы Марокко тарапының апелляциясын қанағаттандырып, Сенегал құрамасына 0:3 есебімен техникалық жеңіліс тіркеді. Бұған себеп — пенальти белгіленгеннен кейін қосымша уақытта сенегалдық футболшылардың алаңды тастап кетуі болды.
Алғашында матч он минуттан астам уақытқа тоқтатылып, кейін қайта жалғасқан еді. Қосымша уақытта 1:0 есебімен Сенегал жеңіске жеткенімен, кейінгі тексерістер нәтижесінде ойын қорытындысы өзгертілді.
