Эйндховендегі жекпе-жек: Қазақ былғары қолғап шеберлері сегіз жүлдемен оралды
Фото: KBF
Нидерландының Эйндховен қаласында өткен Eindhoven Boxcup халықаралық турнирінде Қазақстан боксшылары сәтті өнер көрсетті. Еуропаның таңдаулы спортшыларын жинаған бұл жарыста жерлестеріміз намысты қолдан бермеді.
Құрама қоржынына бес алтын, үш қола медаль түсті. Алтын жүлдені Даниял Сабит (50 кг), Абылайхан Жүсіпов (70 кг), Ерасыл Жақпеков (80 кг), Дәулет Төлемісов (85 кг) және Нұрлан Сапарбай (90 кг-нан жоғары) жеңіп алды.
Қола жүлдеге Ертуған Зейнуллинов (65 кг), Сабыржан Аққалақов (75 кг) және Сағындық Тоғамбай (90 кг) ие болды. Бұл турнир алда күтіп тұрған маңызды жарыстар, соның ішінде Олимпиада іріктеулері үшін таптырмас дайындық кезеңі саналады.
Eindhoven Boxcup – Еуропадағы ең беделді жарыстардың бірі, әрі жас спортшылар үшін мықтылармен күш сынасатын маңызды алаң.
