Дияр Нұрғожай жеңісінен кейін пікір білдірді
Фото: Zuffa LC
Қазақстандық аралас жекпе-жек шебері Дияр Нұрғожай UFC Fight Night 284 турнирінде бразилиялық Бруно Лопесті нокаутпен жеңгеннен кейін өз ойымен бөлісті, деп хабарлайды Pin-UpSport.kz.
Жекпе-жектен кейін Нұрғожай жанкүйерлерге алғысын айтып, UFC-дегі алғашқы айқастарымен салыстырғанда қатты өскенін жеткізді. «Баршаңызға рақмет – ұйықтап жатқандарға да, ұйықтамай қолдағандарға да, арнайы келгендерге де. Бір ғана нәрсе айтқым келеді: алғашқы жекпе-жектерімді тіпті көрмеңіздер! Мен өзімде болмадым. Америкаға алғаш барған кезде кішкене абдырап қалдым. Қазір әр жекпе-жегімде өсіп келе жатқанымды, осында төбелесуге лайық екенімді дәлелдеп жүрмін», – деді ол.
Сондай-ақ қазақстандық файтер жекпе-жектегі шешуші сәт туралы айтты. Оның сөзінше, команда қарсыластың алғашқы раундта агрессив болатынын алдын ала білген. «Иә, тигенін сездім. Дәл емес, бірақ жанап өтті. Біз мұны жаттықтырушымен бірге дайындалдық. Оның бірінші раундта агрессив шығатынын білдік. Мен қозғалып жүрдім, тигізгеннен кейін жібермейтінімді түсіндім», – деп қосты Нұрғожай.
Еске салайық, Нұрғожай жекпе-жекті бірінші раундта нокаутпен аяқтап, UFC-дегі екінші жеңісіне қол жеткізді.
