Australian Open-2026 нәтижесінен кейін Рыбакина WTA рейтингінде үшінші орынға көтерілді
Фото: Australian Open
Australian Open турнирі аяқталғаннан кейін Әйелдер теннис қауымдастығы жаңартылған әлемдік рейтингті жариялады. Оның қорытындысы бойынша Қазақстанның жетекші теннисшісі Елена Рыбакина үшінші орынға көтеріліп, жеке мансабындағы ең жоғары көрсеткішін қайталады, деп хабарлайды Pin-UpSport.kz.
Мельбурн корттарындағы табысты өнер көрсетудің арқасында қазақстандық спортшы әлемнің үздік үш теннисшісінің қатарына қайта оралып, 2023 жылғы нәтижесін жаңғыртты.
Жаңартылған WTA рейтингінде көш басында Арина Соболенко қалды, ал екінші орынды Польша өкілі Ига Швентек иеленіп отыр. Ал турнирге бесінші ракетка ретінде келген Рыбакина Australian Open-2026 чемпионы атанып, бірден екі сатыға жоғарылады. Финалда қазақстандық теннисші дәл осы Соболенконы жеңіп, титулға қол жеткізді. Бұл жеңіс рейтингтегі серпілістің негізгі себептерінің бірі болды және Рыбакинаның әлемдік теннистегі орнының нығайғанын көрсетті.
Мельбурндегі жарыс басқа да қазақстандық теннисшілер үшін оң нәтижелер әкелді. Юлия Путинцева 24 орынға жоғарылап, рейтингте 70-ші сатыға көтерілді. Ол Australian Open турнирінде 1/8 финалға дейін жетіп, соңғы жылдардағы ең сәтті өнерлерінің бірін көрсетті. Зарина Дияс та өз позициясын жақсартып, сегіз орынға көтеріліп, әлемдік рейтингте 282-ші орынға тұрақтады. Ол турнирді алғашқы айналымда аяқтағанымен, рейтингтегі өсім жалпы маусым барысындағы ұпайлардың есебінен жүзеге асты.
Сондай-ақ, жұптық сында Қазақстанның нәтижелері де назар аудартты. Анна Данилина әлемдік рейтингте жоғарылап, 11-орынға шықты. Australian Open-2026 турнирінде ол сербиялық Александра Круничпен бірге финалға дейін жетіп, шешуші ойында Чжан Шуай мен Элизе Мертенс жұбынан жеңілді. Мельбурндегі турнирдің қорытындысы қазақстандық теннистің даму қарқынын айқын көрсетіп, алдағы маусымға оң үміт сыйлады.
Айбар Рысдаулет
Дастан Амангелді «Oktagon» промоушеніндегі дебюттік жекпе-жегін жеңіспен бастады
Криштиану Роналду «Әл-Насрдағы» жағдайға наразы және матчқа қатыспауы мүмкін