Алты қазақстандық боксшы Ливерпульде ширек финалға жолдама алды

8 қыркүйекте Ұлыбританияның Ливерпуль қаласында өтіп жатқан әлем чемпионатында Қазақстан құрамасының жеті бірдей өкілі шаршы алаңға шықты, деп хабарлайды Pin-UpSport.kz.

Гүлсая Ержан (80 келіге дейін) Литва боксшысы Ивета Лесинцкитені 3:2 есебімен ұтып, ширек финалға өтті. Торехан Сабырхан (70 келіге дейін) нидерландтық Роберт Бостан басым түсті.

Сағындық Тоғамбай (90 келіге дейін) ирландиялық Джек Марлиді 4:1 есебімен жеңсе, Айда Әбікенова (65 келіге дейін) оңтүстіккореялық Кан Сок Ёнды айқын басымдықпен ұтты. Бейбарыс Жексен үндістандық Сачинге қарсы жекпе-жекте төрешілер шешімімен (4:1) жеңіске жетті. Ал Айбек Оралбай (+90 келі) түркиялық Мусахит Илиасты сенімді түрде жеңіп, келесі кезеңге жолдама алды.

Жеті боксшының ішінен тек Сабыржан Аққалықов (75 келіге дейін) жарысты ерте аяқтады. Ол украиналық Павло Илюшадан бөлек шешіммен ұтылып қалды.