Данияр Елеусінов жаңа лигада жекпе-жек өткізетінін мәлімдеді
Данияр Елеусинов. Фото: yeleussinovdaniyar/Instagram
Рио Олимпиадасының чемпионы Данияр Елеусінов АҚШ-тың Вашингтон қаласында өткен жекпе-жегінен кейін алдағы жоспарларымен бөлісті, деп хабарлайды Pin-UpSport.kz.
Боксшының айтуынша, бұл кездесу – алда іске қосылатын жаңа кәсіби «ZUFFA» лигасына дайындықтың бір бөлігі. «Рингтен тыс қалмас үшін жекпе-жек өткізуді ұйғардық. Қарсылас кім болса да, дайындық әрқашан маңызды», – деді ол.
Елеусінов қазіргі уақытта америкалық тәжірибелі бапкер Томас Янкеллоның қол астында жаттығып жүр. Егер бәрі ойдағыдай болса, қыркүйекте қайта рингке шығуды жоспарлап отыр. Ал келесі жылдың қаңтарында басталатын «ZUFFA» лигасында тек таңдаулы спортшылар жұдырықтасады.
Өткен демалыс күндері Данияр Елеусінов (13-0, 8 КО) филиппиндік Джеймс Бэконды (26-5, 17 КО) екінші раундта техникалық нокаутпен жеңді. Сол кеште ауыр салмақтағы жерлесіміз Иван Дычко да жеңіске жетіп, америкалық Сэмюэл Кроссданы алғашқы раундта нокаутқа жіберді.
